abu wde3
Admin
عدد المساهمات : 273
تاريخ التسجيل : 16/05/2009
 |  موضوع: فاصل ونعود - للشاعر / محمد أبو زيد الاسيوطي  الثلاثاء ديسمبر 22, 2009 11:28 pm | |
| فاصل ونعود - للشاعر محمد أبو زيد الأسيوطي
بعد الفاصل
ح نكمل مع بعض نواصل
السيرة الهلالية
لبلدنا
ونشوف يا ولادنا
في الحلقة المية
وهنسمع يا ولاد البيت
روايتنا وقصة أبو زيد
علشان العبرة
وهنعرف أيامه وعهدوا
في مسلسل دايما بنشاهدوا
في سنينه الغبرة
وهنوصل بالكاميرا لعندوا
وهنعرف كان مين بيساندوا
وبمين متاصل
أبو زيد
في الروح كان ساكن
ياما زار بحصانه أماكن
هنواصل الحلقة ولكن
بعد الإعلان
علشان التوقيت معدود
والعرض الساري محدود
وهنبدأ دلوقت وحالا
فاصل ونعود
--------
إعلان
-----------
معروض الآن
بدون تقطيع بنوك للبيع علي العملة
وشرط البيع يكون للخونة والعملة
بنوك مليانة نقدية
ومين قال هات يا حرامية
وسهم لوطني لاء ممنوع بنوك مليانة ليها فروع
في كل مكان وبالجملة
علي الراغب يورينا
فلوسه بسرعة ويجينا
عشان قررنا في بلدنا نخصخص حتى زوجاتنا
وح نبيع بكرة أولادنا
خلاص عدنا
-------
وصلنا في حلقة امبارح
لحد ما دخلوا علي صدام
وحكموا علينا بالإعدام
وكان أبو زيد هناك واقف
ولا أتكلم
مع الأولاد وشاف اللحظة السوده
سقوط بغداد
قالولوا ح نعدمه بلم
وعدوا وهدوا أحلامنا
وداسوا عراقنا قدامنا
وشوفنا بطلنا بيسلم
وراح أبو زيد بقي الفارس
بصفته أميرنا والحارس
علي الدولة
عمل فيها شيخ واستولي
وساب أمريكا بتمارس
علينا حقوق مهش ليها
وسابنا ندوق
مرار الذل بأيديها
وتلقي الحجة في الديقة
صديقة
وليه نعاديها
نقوله ازاي
يا عم حرام طب الإسلام
يقول أبو زيدنا عديها
وبعديها
رضينا الموت
بنفس رضية ومسالمة
خدوا البترول ولا كلمة
ولا فيه صوت
وسبوا رسولنا والأمة
في سجن سكوت
ونلقي أبو زيد علي حصانه
كلامه اخرس في لسانه
وقف م الصدمة
في مكانه
خايف م الموت
كما المعهود
-------
فاصل ونعود
----------
آبار بترول عربية بتتصدر وللخونة
سواحل فاضيه مصرية هدايا عمولة للعونة
قصور شليهات ع المينا
وشرم الشيخ وطور سينا
علي أولادنا مقفولة بميت مفتاح
وللسياح
جنينه براح ومشمولة بحمام شمس للسونه
دا حال العدل في بلادنا
خلاص عدنا
-------
وصلنا
في حلقة كانت ماضية
لحد ما شفنا بن لادن
ضرب ضربة مهش قاضية
وأمريكا ولا تهادن
بتضرب كل يوم فينا
وبتخرب وبتهرب
سلاح نووي بترمينا
وبتجرب
وفين أبو زيد
ولا بيسأل
خربت البيت
ولا بيسأل
ونسأل عنه يتهرب
وإسرائيل بتطحن طحن
في فلسطين
وكل يومين آلاف الشهدا
والمساجين والاعتقالات
سجلات
ليها مفتوحة
ونفس القدس مجروحة
بتبكي نار وتشكي
يا ناس
وفتح بتغلي ويا حماس
وفين مشعل وفين عباس
من الاقصي
كفايا خلاف بقي
وإتلاف خلاص نصحي
دا إسلامنا
بينهاكم
عن التخريب واعز حبيب
رسول الله قال اتحدوا
كفايا نعيش سنين ماسآه
من العادي
وإحنا كمان بقت عادي
نجرح بعضنا ونقسه
قلولي أزاي بأيها وش
يوم العرض
هنقابل ألهنا لمه يسألنا
عن الأمة وأعمالنا
وليه الأرض
تتاخد كده منا
وليه في العرض بنفرط
ونتورط
مع بعضينا في مآسي
وليه أبو زيد ماهوش راسي
علي اللعبة
شايفنا في مرحلة صعبة
وراح ناسي أمانينا
وغمي قلوبنا وعنيا
وخدنا بظلم ومشينا
طريق مسدود
---------
فاصل ونعود
---------
يوجد شركات للاستثمار ومين يا كبار بقي هيقدر
يشيل الشيله بلا نيله قالولنا عليها دي بتخسر
وجوه العرض
حتة ارض
للي هيدفع الأكتر
ح تتوزع لكن علي مين
سؤال وجوابه مش عارفين
علينا مستحيل طبعا وإحنا مالكين أصلاً
د لعبة سرقة مكشوفة وناس بالاسم معروفة
يا شعب وأيده مكتوفة
بياخدوا مننا قوتنا
خلاص عدنا
-------------
وصلنا في حلقة فاتتنا
لحد ما قالو ح نعدل
نشوف دستور علي كيفنا
نغير فيه وهنبدل
وهنفصل بأيدنا قميص
علي كدوا
رخيصة قماشته لكن عال
شارية والمال
ده من كدوا
بلدنا أميرة بنت حلال
وجالها عريس هتتجوز
وليه في فرحها بنبوز
دا مهما طال
معاد الزفة ح يجينا
ومبروك ليها أو لينا
دا واد رقة وأدب وكمال
وابن حلال دا احلي عريس
عيونه كلها طيبة
عليه هيبة ووقار وجمال
يخلي البدر منه يغير
وشكله أمير وابن أمير
وقلنا كتير لكل ضمير
بدلنا الحلوة تستاهلوا
عشان خاطر عيون أهلوا
دا واد من عيله متدين
وشكله والنبي حنين
وخاطبها بقاله سنين وعندوا فلوس ومش هين
توافق يبقي يا سعدك
هترفض يبقي هطين
عليك وكمان علي ناسك
وتشرب من مرار كاسك
وتلقي سيادتوا فوق راسك
دا أبوة كان شيخ وبيبين
عمل لبدلنا تحويطه
وناس بيقولوا توريطه
رسم أحلامه في خريطة
وع الحيطة
صبح مكتوب هيتعين هيتعين
ده واد واصل ومتاصل
وأقولك إيه
معدش فيه كلام واصل
دا واد مسنود
لكن ربك أكيد موجود
فاصل ونعود
دا لو عٌدنا
مع تحياتي الشاعر /محمد أبو زيد الاسيوطي | |
|
